Agjencia e Kërkimit, Teknologjisë dhe Inovacionit (AKTI)

Agjencia e Kërkimit, Teknologjisë dhe Inovacionit (AKTI) është një institucion publik, me statusin e personit juridik nën varësinë e Këshillit të Ministrave. AKTI është krijuar me vendim të Këshillit të Ministrave dhe ka nisur punën në Mars 2010.

Krijimi i AKTI synon ndërtimin e një sistemi modern të shkencës, fuqizimin e kërkimit shkencor dhe teknologjik, si dhe integrimin e tyre në sistemin e arsimit të lartë.

AKTI lehtëson shkëmbimin e njohurive, veprimtarisë së përbashkët dhe partneritetit brenda dhe jashtë vendit, me qëllim forcimin e kërkimit në vend dhe rajon.

Vizioni i themelimit të AKTI është krijimi i një strukture koordinuese dhe udhëzuese që bashkëpunon me institucionet në fushën e shkencës dhe teknologjisë duke shërbyer zhvillimin e qëndrueshëm të vendit, realizohet në përputhje me përparësitë kombëtare, zhvillimin e politikave shkencore dhe teknologjike dhe menaxhimin e Kërkimit dhe Zhvillimit të institucioneve të linjës.

Financimi

AKTI është institucion buxhetor dhe financohet nga:

Buxheti i Shtetit - Në formën e një granti, zëri "Fondi për Shkencën, Teknologjinë dhe Inovacionin(FSHTI)", akordohet sipas nënzërave të mëposhtëm:

- Fondi për programet kombëtare të kërkimit dhe të zhvillimit;

- Fondi për infrastrukturën e kërkimit;

- Fondi për qendrat e ekselencës në kërkim;

- Fondi për transferimin e teknologjisë dhe inovacionin;

- Fondi për kërkuesit e rinj;

- Fondi për programin Brain Gain.

Mjete financiare nga:

- Palë të treta, të destinuara për SHTI-në;

- Programet dhe projektet e BE-së, të shteteve të veçanta dhe të organizatave partnere;

- Donacione të subjekteve fizike dhe juridike, të vendit dhe të huaja;

- Sektori privat, vendas dhe i huaj.